REMEMBER

 

Remember (2022), ye un film dramáticu coreanu, nel que la venganza ye la xixa fundamental que le chaculla a un ancianu, nos últimos momentos de la sua vida, con un alzheimer que l’estraga cadavé más, y con una vida amargada polo sou pasáu que sofríu tola familia por culpa de la invasión del imperiu de Xapón na península.
Esti drama resalta más que por tol entramáu d’acción que lleva’l protagonista pa efectuar la sua venganza y la razón histórica familiar d’esta, ye la consideración de la vida del protagonista, un ancianu mui simpáticu, que sigue trabayando na hostelería con ochenta años, siempre contento y aparentemente feliz, mas cuando siente que la sua vida está acabándose, y que pué queidar cumo muertu en vida, ensin memoria, entos resuelve nel sou interior, que la sua vida ya nun tié más sentíu que la venganza. Crióu a los fiyos, la sua muyer murríu, está solo, mas solo le queidan los sous recuerdos familiares de sofrimientu, padecimientu, torturas y muerte que tienen culpable, y eso nun lo pué esqueizar, nun lo quier esqueizar a pesar de la enfermedá que tié y los años que pasaron daquella.
Él aberrunta que la venganza ye lo últimu que pué redimilu, y asina escomienza matar a los sobrizaron a la invasión xaponesa y torturaron y mataron a la sua familia. Nesti llabor, atoupa con un compañeiru de trabayu, todo un rapá, qu’a pesar de que nun entiende nada d’esto, siente tamién cumo esos collaboracionistas siguen siendo los mesmos que oprimen a los trabayadores coreanos, cumo ye’l sou padre.
La final tié muchu molledo, y ye una sorpresa, cumo unu de los responsables collaboracionistas a la par que víctima, ye’l mesmu protagonista, del que tamién quiér vengase.
Cuidándolu bien, todos semos collaboracionistas y víctimas del sistema nel que vivimos, pos ñacemos y prosperamos n’él, y escongriamos a outros trabayadores activa ou pasivamente en pequeiñas xeiras drento del sistema y esti mesmu sistema oprímenos cumo trabayadores que semos.
Anque’l protagonista ye esta persona anciana, rialmente la remembranza está siempre presente y traquiña todu con múltiples evocaciones y enrecuerdos impactantes y dolorosos, que fá al espectador empatizar cola sua llocura vengativa.
Mas esa llocura vengativa, nun ye más qu’un estampaníu d’años y años de vivir na amargura, cola falsa apariencia de felecidá, esa felecidá que nos enrata por tolos compromisos familiares, sociales y económicos que nun nos deixan ser lo que sentimos.
L’enrecuerdu ye’l combustible d’una vida que ya nun tié sentíu, pos todos esas responsabilidades esfungáronse cuando está cerca la muerte.
Cuando van pasando los años, y con ellos la edá, la memoria va siendo cadavé más pesada, y cadavé se siente más murnia, señardá, resentimientu y con esto, derrota. Quicias, tarde pordemás.