CONSIDERACIONES SOBRE LAS LLUCHAS DEL RURAL

 Consideraciones  sobre las lLuchas del rural.
D’estas lluchas rurales que nas capitales cuidan que nun esisten, esplotan griescas y conflictos d’intereses que siempre apaecen cuando menos l’asperan.
Estos intereses pueden fácilmente determinase según la crase social, la sua condición económica y vital. Pos cola intrusión de las macroesplotaciones ganaderas amostraron cumo neste mediu rural de tan pouca pobración, hai diversidá de vidas y de ganase la vida, entre aquellos qu’están a “sueldu” de las corporaciones agroganaderas ou pescudaban un emplegu drentu d’estas, y los que nun viven d’estas. Agora frente al peligru d’instalaciones gasísticas derivadas del muradal, amuestran más craramente tovía, los qu’están al serviciu del Capital y los que non. Equí, amuéstranse tamién, la falta de vecindá, el mayor individualismu que confrontan los intereses económicos, los favoritismos, l’oportunismu d’alcaldes qu’actúan cuando se sintieron pordemás presionaos y el caciquismu.
Mas debido a qu’estas instalaciones nun crían entovía menos beneficios sociales, nin emplegu a los llugareños, pué qu’haiga menos expectativas de poder beneficiase y por eso, la retólica social está siendo mayor y más contundente. Úñise a esto tamién l’agresión d’estos capitales internacionales qu’están siendo más masivamente ofensiva, pola gran cantidá de proyectos que s’están queriendo implantar a la vé, con subvenciones europeas.
Rialmente, estas griescas rurales nun son de crase, nin son d’obreiros asalariaos, son precipalmente de pensionistas y pequenos propietarios que se sienten agraviaos, y tienen un pesu ideolóxicu fundamental nel carácter d’estas manifestaciones, yá que nun pescudan en qué consisten esas razones y intereses económicos pa que quieran invertir millonariamente por estas tierras abandonadas de las actividades económicas de la ciudá.
Rialmente, creyen nel sistema y nel réxime, y nun lo trastabadian, inclusu pescudan na llei y na constitución el sou fundamentu ideolóxicu y manifestación social.