EL RURAL CUMO PARQUE TEMÁTICU PA LOS FOLASTEIROS

 

El rural cumo parque temáticu pa los folasteiros.
¿Rialmente, quién cuida que ye una felecidá pa los rurales que vengan los folasteiros?
¿Qu’aportan estos folasteiros a las nuesas aldeyas? Esos que son fiyos y descencientes de l’aldeya, cuando vienen en branu, parez que solo vienen a cucear tolo que pueden, pa pescudar que pasóu na aldeya todos esos once meses que nun estuvieron.
Estos forasteiros cuidan que la vida rural, la sua hestoria queida parada, paralizada cumo si fuera una fotu, dende que marcharon depués del branu.
Ellos consideran que ensin ellos, nun hai vida, qu’estamos muertos, qu’ellos son los únicos que dan marcha y actividá, que nun facemos nada, que nun tenemos ensin ellos nin vida cultural, social, vecinal, nada de nada.
Mas la verdá, estamos deseyando que marchen, cadavé nos visitan más tarde, con menos tiempu, y solo vienen pa cerca de las fiestas del branu, que gasta’l conceyu pa qu’ellos se diviertan, siete días al añu. Solo vienen pa nun deixar dormir y descansar del trabayu, pos ellos cumo están de vacaciones, los demás tamién tenemos que lo estar, cumo ellos. Salen hasta las tantas de la noche, dando voces polas caleyas, cuando tenemos que tener abiertas las ventanas pol calor que fá, nun podemos dormir en paz. Nel sou consumu diariu compran na ciudá, y cuando están las fiestas, tampouco aportan nada, pos tolos gastos de fiestas, y bebidas, nun las facen nel bar sinon que facen boteillón, nas suas morralas que beben nas caleyas y tíran todu pol suelu, lo que fá qu’haiga más gastos pal Conceyu, pos tienen que pagar pa que lo barran. Rialmente, los bares yá nun son beneficiarios de las fiestas, sinon tolo contrariu.
Estos folasteiros son lo más asemeyaos a los turistas de la costa, solo vienen a beber y esfrutar, y nun les importa qué problemas tenemos los vecinos: l’abandonu institucional y servicios, la degradación ambiental, la contaminación de la agroganadería industrias, l’abusu de las istalaciones “renovables” y la falta d’emplegu.
Ellos mírannos a los que vivimos equí, cumo si fueramos monos de zoo.