CONSIDERACIONES XEOGRÁFICAS Y ESTADÍSTICAS

Consideraciones xeográficas y estadísticas.

La zona na que se ubica estas consideraciones ye Almaraz.

Aldeya que forma parte de la comarca de Tierra del Pan, drento de la provincia de Zamora, a unos 20 kilómetros de Zamora, en dirección a la Villa alistana.

Anguaño, cuenta con una pobración de 401 empadronaos, sigún l’INE 2022.

El térmanu municipal lliende al norte con Zamora, al mediudía y al naciente col riu Dueru, y por últimu, al poniente con Muelas y Villaseco del Pan.

La orografía del térmanu d’Almaraz ye variable anque predomina una suave accidentalidá.

Tié un clima mediterráneu continental con un fuerte contraste entre iviernos frios y branos cálidos. Las lluvias suceden precipalmente en primavera y outoñu.

Almaraz forma parte de lo que ye´l mediu rural, pos tié una densidá de pobració de 8,95 hab/km2 y ye un llocalidá menor de 5000 habitantes.

Y cumo mediu rural, sofre los mesmos problemas de perdá de pobración, yá que dende los años cuarenta que tenía más de 1000 habitantes, en todos estos años hasta’l 2021, perdióu más de 700 habitantes.

La falta d’oportunidades llaborales fúi y sigue siendo clave pa que siga emigrando la rapaciada.

Todo esto, precipalmente lo favorez un sector agrícola-ganaderu que pierde cadavé más probración activa, que fúi’l fundamental nel puebru, cumo yacimientu d’emplegu.

El sector servicios ye’l que más cria emplegu, siendo’l propiu conceyu mesmu, el mayor emplegador, pos alministra una residencia municipal, apartamentos turísticos y colas obras municipales ye’l precipal oferente d’emplegu na llocalidá. Todo esto ensin contar cola explotación ganadera vacuna extensiva que tié, que fomenta obras municipales y que sobriza la prevención de incendios, que puedan ser mayores.

Las demás empresas del conceyu, son bares, comercios y panadería que son de carácter familiar, y fundamentalmente trabayadores autónomos.

Nun pierde más mocedá, debido a que´cumo aldeya cercana a Zamora, sirve de residencia y trabayando fuera d’esta, mayormente na capital.

Mas on asina, ye una pobración sumamente enveyecída, pos uñíu a la pobración autóctona que tié Almaraz, súmase tola pobración venida fuera pa vevir na residencia.

Este marcu definíu, amuéstrase cumo la mundialización de la economía capitalista qu’afecta arrasadoramente nesta llocalidá, onde un sector productivu cumo’l agrícola-ganadera qu’emplegaba a tola l’aldeya, sigue perdiendo trabayu, precipalmente por culpa d’una política de concentración de capital económicu nas ciudades, esqueiciendo al rural en poder modernizase: criando nuevos emplegos, con nuevas infraestructuras que procurara actividá económica. Esto fá que’l trabayu rural escaséi inda más y recompense menos económicamente y la xente emigre a llugares onde hai más trabayu, meyor pagáu y en meyores condiciones porque precisa tamién de menos capital invertido, polo tanto menos riesgo en perdelu.

La masiva tecnoloxización mundial de la producción agrícola y ganadera, tanto en maquinaria cumo n’infraestructuras, precisa de mayor capital invertíu y menor fuerza de trabayu, polo que dificulta la inserción llaboral y d’autoemplegu.

Tamién hai que sentir cumo’l mercáu mundial fá que los productos de cereales, ovinu y vacunu que se producen compiten n’inferioridá de condiciones, y imponen precios con un monopoliu de la industria y los intermediarios.

El sector porcinu que s’esfungóu prácticamente colas pequeiñas explotaciones caseras, empuntiúse nuna macroexplotación intensiva recién instalada, que satisfaz un mercáu de xixa más barata y d’exportación a outros países, lo que está produciendo molestias y queixas debido a los malos cheiros de los purines que s’esperrian nel térmanu cercanu.

Estos purines más tolos productos fitosanitarios y minerales que s’esperrian nas tierras, están criando un problema de contaminación ambiental, pos nun se debe beber augua directamente del grifu, y hai que dir buscala a la depuradora ou comprala.

La globalización a mayores d’afectar al emplegu y a la producción nos sectores económicos agrícola y ganaderu, tamién afecta con xixa nel mundo de las nuevas tecnoloxías, pos la cobertura telefónica y d’interné ye precaria, pos acaba de llegar la fibra óptica a través d’un monopoliu, y la cobertura telefónica tamién ye d’outru monopoliu, ensin haber posibilidá de conseguir outras tarifas más asequibles que pudieran ufiertar estos servicios, polo que pa apañar estos servicios, estos cuestan más polo mesmu que na ciudá.

L’aislamientu d’esta aldeya nun solo ye a causa de las nuevas tecnoloxías, sinon tamién d’unas infraestructuras viarias mal mantenidas, que dificultan el sou tránsitu.

Las relaciones interxeneracionales drento de la llocalidá llimítanse prácticamente a la vida familiar, pos socialmente las personas mayores no facen vida social nin actividá sociocultural ninguna. Mayormente toda esta vida social está reducida a la vida nel bar, nun hai alternativas socioculturales. Polo tanto, nun amiente nel que’l llugar d’alcuentru solo ye’l bar, nun fomenta más que’l alcoholismu, pos nin los comercios tampouco lo son, ya que cadavé la xente que tié coche va comprar a la ciudá, non al comerciu cercanu.

L’alcoholismu ye un problema mui a tener en cuenta, pos hai presonas que se les siente craramente con un alcoholismu crónicu, uñíu a todu esto, las fiestas son momentos onde s’incentiva pubricamente’l consumu d’alcohol nas caleyas, nas plazas, nos coches, onde se regunen la rapaciada, tanto los folasteros cumo los que residen diariamente.

Estas fiestas, especialmente las de branu, enciscan conflictos interxeneracionales; pos los que las esfrutan: la rapaciada que nun viven ellí, dan gastos abondo importantes pal conceyu, que nun favorecen a las cantinas, yá que los rapaces facen botellón. Mientras las infraestructuras y servicios municipales se van degradando, y nun s’invierte nel sou mantenimientu nin meyora.

Las pensiones más baxas son las que cobran los que se retiraron del campu y muchas tienen pensiones non contributivas ou viudedá, ya que nun cotizaron, cumo la muyer del campusinu. Estos pensionistas son los que sofren mayormente la chubida de los precios de tolos recursos enerxéticos, y dificulta instalar calefacción. Asina, siguen usando’l ciscu, el braseru eléctricu con tol peligru que tié, y muchas  veces tampoucu tienen buen aislamiento térmicu na casa. Todo esto fomenta más l’empobrecimientu.

La corrupción, ante la falta d’oportunidades d’emplegu, si nun s’emigróu, fomenta muchas veces la busca de favor del alcalde, pa conseguir trabayos temporales que complementen el sou subsidiu ou los sous ingresos campusinos. Polo que, este ambiente fomenta’l favoritismu.