EL PESCADOR FLAUTISTA

 

EL PESCADOR FLAUTISTA.

Un pescador, mañosu flautista, fúi a la mar, llevando la sua chifla y la sua rede. Asentáu nuna peiña que s'afincaba nel augua, púsouse a tocar la sua chifla, cuidando que los peces, amorgaos pola dulce melodía, brincarían de l'augua pa cayer nas suas manos.

Baldáu, a la fin, de tanta inútil xixa, abandonóu la flauta y, tirando la rede, apañóu gran númaru de peces. Sacóulos de la rede, esparcíulos curiosamente sobre'l arribanzu y cumo los viera rebullise na agonía, retolicóu:

-¡Malditos animales. Cuando asopraba la mia chifla, nun teníais deseos de baillar, y agora que nun la toco, escomenzáis la danza de la muerte! ¡Siguide asina, que la sarten vos aguarda!

Cada cousa al sou tiempu,

y los ñabos n'avientu.