LAS GRIESCAS RURALES NEL NOROESTE PENINSULAR.
LAS GRIESCAS RURALES NEL NOROESTE PENINSULAR.
Anguaño, el
conceptu de rural considérase acullá de lo que tié que ver colo agrícola y
ganaderu. Anque etimoloxicamente, rural bien de campu, cumo entornu onde
s’alcuentra.
Tamién pobracionalmente,
entiéndese cumo núcleu rural aqueillas pobraciones con menos de 10000
habitantes, más hai estudios que riamente plantian lo rural, cumo aquellas
llocalidades con menos de 5000 habitantes.
Lo rural, nel
imaxinariu colectivu, especialmente miráu dende la ciudá, cuida que ye’l llugar
onde se realizaba solamente l’actividá económica agraria, de la que sosistía la
pobración rural.
Mas rialmente, nun
fúi asina. Ye verdá que l’actividá agroganadera yera onde pivotaba tolas demás
actividades económicas, que tamién existían no rural, que yeran de carácter
artesanal, cumo el sector servicios, cumo comercios y cantinas, yeran llugares
precisos p’abastecese y de regunión social.
Al píe d’esto, tamién
había alredor bien de trabayadores en talleres artesanos, que suministraban de
ferramientas a una llabranza tamién de producción artesana, cumo yeran los
ferreiros, y proveían tamién de productos a la economía casera-familiar, cumo
la panadería, alfarería, cestería, construcción…
Craramente, cuando
la producción agraria fúi cadavé más
tecnoloxizada, con una maquinaria que procedía de la industria exterior, de la
ciudá, muchas d’estas actividades económicas fueron arroñándose, y al igual que
cadavé se precisaba de menos fuerza de trabayu pa producir productos agrarios,
tamién s’entoñaban las actividades sosidiarias.
Asina, sigue
existiendo, estas actividades secundarias, pero cadavé más independientes de
las necesidades de la pobración agrícola-ganadera, y esto fá constituyir tamién
una fuente de griesca, y va explicase.
Lo rural, está
talmente afectáu en tolos movimientos d’economía mundial, pos en custiones
agrícolas, los sous productos cotizan, y el resultáu d’estos escotes facen
chubir ou baxar los precios de venta de los sous productos.
Tamién, anque’l
númaru de trabayadores agrarios nel rural, está’n franca minoría respectu a la
pobración total que vive nella, la sua presencia ye importante, pos la siente unu
inmediatamente, visualmente, más nada salir pola puerta.
Sobre la calidá de
vida rural, está sofriéndose muchu y, en muchas llocalidades desciend’el nivel
de augua potable pa’l consumu caseru, cumo tamién la perda de la sua calidá,
enllegando a tener qu’actuar los conceyos en prohibir el sou consumu, a causa
del altu nivel de nitritos, con un augua cadavé más contaminada, y que pa que
pueda ser consumida precisa d’un procesu y tecnoloxía de depuración cadavé más
cara, con más inversión, ensin consiguir tampouco un gusto apetecedor.
Na internacionalización
que se padez, que condiciona a lo rural, hai que tener bien en cuenta que dende
la ciudá quieren ver un mediu ambiente rural más “idílicu” nel que se pué
llegar de turista, pos tamién dende fondos europeos de la Uñión Europea,
sovencionan pa fomentar actividades turísticas, hosteleras y con estas tamién
relacionadas l’artesanía. Y frente a esta percepción, críase tamién conflictos,
ente sectores económicos qu’están implicaos no rural, por un sitíu, las
corporaciones agroindustriales cola simpatía de muchos agrícolas y las suas
organizaciones; frente al sector turísticu, y el sou entornu.
A cuenta de que la
presencia de lo estatal aumenta, pos unu de los mayores ingresos qu’entran no
rural vienen del Estáu, especialmente de las pensiones, eso fá qu’alredor
d’esti estratu social, viven muchos trabayadores, que viven de los servicios, y
que conciben un mediu rural, tamién alloñau de lo agrariu, a la sua vé con
intereses diferientes a esti.
Por eso, anque las
griescas rurales son apenas percibías nas ciudades, pos amás son
cuantitativamente non mui numerosas, pero en relación col númaru d’habitantes
que viven no rural, llaman l’atención social.
Los problemas
sociales que se pubrican y que demandan estas movilizaciones, yá existían con
antelación, mas por cuenta de que la cresis dende’l 2008, están agudizándose,
ya que las diferientes corporaciones empresariales están queriendo implantar
nel campu unas instalaciones de cadavé mayor tamañu, que buscan llugares
despobraos onde poder invertir pa crecer los sous capitales, que van al
serviciu del consumu de las ciudades.
Nesti contextu,
están saliendo diferientes lluchas sociales de diferientes componentes que
muchas veces confluyen cumo outras veces s’escachan y compiten, según la
implicación y características d’estos colectivos.
Los cuales, son más
o menos independientes de partíos, sindicatos y organizaciones empresariales, y
muchas veces tamién son tan pequenos, que resultan d’una relación interpersonal
anterior, que se facen casi impermeables a nuevos miembros.
En resumen,
precipalmente las movilizaciones rurales están siendo las siguientes:
Vecinales
Campusinas
Medioambientales.
Las movilizaciones
vecinales, seguramente seyan las más amplias y masivas, mas tamién nas que
influyen los partíos, organizaciones y sindicatos del réximen, que buscan
l’oportunismu políticu, nun momentu de descontentu social.
Estas, suelen ser
las demandas sanitarias, con continuas denuncias y reclamaciones particulares y
locales. Agora que se está viendo bien estenu que la sanidá rural, más
concretamente l’atención primaria, que ye la que está más instalada no rural,
está cada vé más degradada, con menos personal sanitariu, especialmente
médicos.
Onde
l’asistencia personal ye cadavé menor, siendo sustituyída pola telemedicina.
Estas
movilizaciones están estructurándose en plataformas y colectivos vecinales,
qu’anque tienen autonomía nel sou furrulamientu, las influencias de partíos,
organizaciones y sindicatos del réximen, tiene abondu caláu entre los líderes.
El descréditu de
todos estos partíos, organizaciones y sindicatos queidan nel disimulu, nun se
pubrican craramente.
Este ye una llucha
precipalmente d’estratos populares que precisan d’una atención primaria
cercana, y non tener que recorrer cadavé más kilómetros pa poder ser asistíu en
consultas diurnas y n’urxencias.
-Las movilizaciones
campusinas.
Historicamente, las
lluchas campusinas siempre son las más remembradas, ensin contar colas
xornaleras, que tienen muchu más que ver colas lluchas obreiras.
Nesti casu, de lo
que se fala son de los llabradores que trabayan por cuenta propia, que tienen
los sous medios de producción, anque fueran en réximen d’arrendamientu.
Anguaño, todo esto
yá s’enfunguíu casi talmente, nesta situación económica, solo queidan los
qu’están pensando más nas suas pensiones y n’aguantar los años que le queidan
pa ser pensionista. Estos trabayadores nun tienen ya nengún plantiamientu nin
d’ampliar nin de modernizar las suas explotaciones, simpremente quieren pasar
el tiempo y poder ganar abondu diñeiru pa mantenese y pagar mínimos gastos.
Los que rialmente
se plantían vivir nel campu, suelen ser fiyos d’estos, nun hai prácticamente
naide qu’escomience nada nuevu de la nada. Estos fios que se criaron nel
ambiente agrícola-ganaderu, tien el deseyu d’aprovechar una infraestructura mínima
heredada, pero queida antiguada rápidamente, polo que pa poder siguir na
dinámica económica de continua “modernización” tecnolóxica, talu cumo s’ufierta
y s’amuestra dende las corporaciones, precisan empeñase cadavé más, y nunca
consiguen pagar la deuda, yá que uñe una deuda continua pa poder siguir empeñándose
pa poder siguir invirtiendo en más capital fixu.
Esta deuda colos
bancos, va uñíu que tola sua xeira depende de los precios qu’imponen las
corporaciones p’alimentar de recursos y material a la sua explotación, cadavé
precisas de más capital variable pal funcionamientu, pa que siga rodando la
producción, mas estos mesmos, directa o indirectamente están rellacionaos colas
corporaciones qu’imponen los precios de los productos de la explotación pa la
sua comercialización.
Polo que
rialmente’l llabrador, ye más y más un
trabayador más dependiente, que solo trabaya pa producir lo que’l mercáu manda,
a traviés d’estas corporaciones qu’imponen los sous contratos mercantiles y/ou
los sous convenios cooperativistas.
La rialidá ye que
son FALSOS AUTÓNOMOS, cumo se denominan a outros colectivos que demandan entrar
nel réximen xeneral, más estos campusinos, vienen d’una cultura yá
prácticamente desfeicha y muerta, heredada na que suas padres y buelos podían
vender los sous productos más o menos llibremente n’alcuerdos privaos, con
intermediarios particulares ou nos mercaos y ferias.
Y cumo tienen
sentimientu de propiedá, de ser propietariu y nun hai nadie físicamente que le
impongan unos horarios nin un salariu, la sua dinámica ye la de creyese llibres
económicamente, con una producción individual, na que’l vecinu podrá cuidar la
ser competencia nel mercáu, nos pastos, nel territoriu.
Con estos
antecedentes y cola falta de cadavé más espacios nos que pueda realizase xeira vecinal,
la llucha organizada sindicalmente e independiente de las organizaciones
–“sindicatos agrarios del réximen, ya rialmente bien difícil.
Agora mesmu, las
movilizaciones que facen los campusinos, que se ficieron enantes del escomienzu
de la epidemia y anguaño, son empuntiadas por estas organizaciones del réxime
que dalgunos d’ellos cuando naciorun, buscaban acabar colas cámaras agrarias,
que yeran una alcordanza de los sindicatos verticales del franquismu, mas asumióronlu
pa poder apresentase a elecciones y poder “demostrar representatividá”, pa
asína negociar cola alministración.
Esas lluchas de los
70 y escomienzos de los 80, que fueron la fundación del sindicatu Uñión de
Campusinos-COAG, que ruchóu de las movilizaciones economicistas de xeitu
independiente, que se basaban nuna tovía vida vecinal campusina, con abonda
proporción de trabayadores nesti sector. Nesos momentos, dalgúnu de los
históricos remembra cumo diban polas aldeyas a explicar a la xente nas caleyas
los sous problemas y represiones sufridas.
Agora mesmu, a
cuenta de la sua escasez pobracional y corporativismu. Dende’l restu de la
pobración miramos a los campusinos cumo extraños, nada cercanos, pos lo agrariu
está cadavé más allongáu físicamente de la vida urbana, inclusive rural, pos
relativamente la pobración que vive de lo agrariu ye minoritaria. Ya qu’el pesu
de la alministración a traviés de pensiones y de emplegu púbricu, la
construcción y el sector servicios que tamién dependen muchos d’estas mesmas
pensiones, cumo son l’atención a los ancianos fá ver la problemática agraria
cumo dalgo ayenu, pos nun se vive económicamente d’esto, directamente.
La participación de
los partíos políticos del réxime ye puramente oportunista, dependiendo si están
ou nun están drentu del gobiernu autonómicu y estatal.
LAS LLUCHAS
MEDIOAMBIENTALES son una fuente constante de conflictos y desalcuentros, por
eso, los partíos del réxime entran ou non nestas dependiendo de lo masivu que
seya la reivindicación concreta, y los sous discursos son más o menos
comprometedores según estén nos gobiernos responsables, y puedan enratalos
políticamente.
Drento de las más
masivas, nas que confluyen casi tolos estratos sociales, vecinales,
llabradores, son los que tienen que ver cola implantación d’infraestructuras
con un fuerte impactu social y económicu cumo centrales térmicas, nucleares y
los sous muradales, incluido nel sou momentu las instalaciones de presas
hidroeléctricas, qu’esti branu criaron polémica pol vaciamientu de los
embalses, nuna pura especulación ante la chubida de los precios eléctricos, pa
vender la llectricidá hidráulica a preciu de llectricidá gasística.
Nesti casu, los
activistas de todu esto, suelen ser alcaldes más o menos comprometíos o
colectivos vecinales que consiguen movilizar masivamente, anque temporalmente
la sua existencia seya fugaz.
Las movilizaciones
contra las macroinstalaciones de centrales lléctricas –solares y eólicas-, on
están siendo abondo minoritarias, y nestas, los campusinos participan más o
menos según les afecten directamente al aprovechamientu ganaderu de territoriu.
Las lluchas onde
hai más conflictu social drento de la mesma pobración pa consiguir influir nas
alministraciones, son las de la defensa de la existencia del llobu o la sua
caza más o menos controlada, tamién son la reivindicaciones que siguen amostrándose
ante’l peligru de la construcción de macropocilgas.
Nestas lluchas, los
campusinos y las organizaciones que dicen que los representan, enfréntanse
craramente contra los colectivos vecinales, que prácticamente ensin sobrizu
partidista y furrulando con independencia, demandan tanto dende la ciudá, por
personas lligadas a lo rural, cumo por los habitantes rurales (anque muchas
veces, nun son los más activistas) quieren influir nel campu, cumo llugar
habitable, agradable y de naturaleza, dalgu que los primeiros se sienten atacaos,
porque toda aqueilla midía que se pueda plantiar, fá sintise enratáu, nun
llibre na sua producción. Y provocan enfrentamientos mui enconáos, inclusive
entre vecinos.
Pos craramente,
muchos campusinos enviscaos polas organizaciones, ante la cuestión del llobu y
los sous ataques, culpan a estos colectivos cumo responsables del sou
arroñamientu económicu.
Ante’l problema de
la macroganadería industrial, anque son infraestructuras fomentadas por capital
de corporaciones folasteras; muchos campusinos siéntense molestos, envispaos
polas organizaciones corporativistas contra la movilización de los colectivos y
activistas que denuncian y ponen trabas a que se instalen, pos siéntense tamién
atacaos, yá que cuidan que los próximos pueden ser ellos mesmos, que le fagan
menguar la sua llibertá nos sous métodos de producción ante’l entornu
ambiental, y finalmente, tamién provoque’l sou arroñamientu económicu.
Hai una frase
qu’están repitiendo de contino los dirixentes de las organizaciones agrarias,
ye la de que la pobración nun sabe lo que ye l’agricultura y esti desconocimientu
del campu va conseguir acabar colos llabradores, pos esti desconocimientu del
campu impedirá producir, pos las cadavé más trabas ambientales acabarían cola
producción.
Estos mensaxes son
rialmente muchu más repetíos que los puramente economicistas ante los baxos
precios qu’imponen las corporaciones a los sous productos.
El paradigma
idílicu que plantían dende la Política Agraria Común y de los fondos europeos
nas sovenciones agrarias y rurales, nel que’l campusinu seya mantenedor del
mediu ambiente, atopa drásticamente frente a un modelu económicu capitalista
d’una producción agraria y ganadera cadavé más intensiva y industrial, qu’aborrece
gran parte del territoriu, onde abundarán los animales silvestres pa que haiga
cadavé más cotos de caza mayor elitista, mientras outros territorios se
contaminan cadavé más de nitritos y fitosanitarios.
Comentários