LAS CUESTIONES FILOSÓFICAS EXISTENCIALES DE JOB (II)

 

LAS CUESTIONES FILOSÓFICAS EXISTENCIALES DE JOB.

Nesti llibru, Job sufre con devoción, los males que s’enviscan, ensin revuliciu, on sabiendo que todos estos que tienen destinu n’él, primeiru sobre los sous bienes, después sobre él mesmu, siendo cumo únicu causante Yavé, el mesmu Dious a quien adora.

El mal nun ye cumo nos enseñan culturalmente, que lo encisma’l Diabru, sinon vien d’el mesmu Altísimu, el mesmu que también ofrez bondades. Eso lo tien bien craru Job, cuando diz que de Dious vienen los bienes cumo los males. Y tal cumo aceptaba con gayola las riquezas y la salú, porque nun tié porqué nun asumir las maldades. Asume qu’esi Ser, quita y pon según el sou poder, pos él sabe qu’él mesmu nacíu “desnudu”, ensin nada, asina nada tié perder.

Todos estos malos momentos de la sua vida, que s’está arroñando, cumo ye de cuidar, supón a Job graves padecimientos que l’amurnian, y fá preocupase sobre’l sentíu de la sua existencia, pos anque quier creyer que la vida tien sentíu dende que ruchóu del vientre de la sua madri. Tol sou dolor remúerdele la conciencia frente a l’agresión de la vida. Por eso, en tol llibru, ye una griesca entre la esperanza y la decepción ante lo que sucede.

Tamién, el llibru ye una griesca entre qué sentíu tien y qué consecuencias traye pa la vida: actuar bien ou actuar mal, pos faga lo que faga, él está sofriendo del mesmu xeitu, igual da qu’el home seya xustu ou inxustu.

Si fá mal tien miedu al castigu, mas si fá bien, recibe mal, igualmente.

¿Entuences, que debe facer la humanidá?

Esta fábula ye una contínua dialéctica entre él y la sua familia, y entre él y los sous amigos, na fin, entr’el home y la vida, que buscan dar sentíu a la existencia con esperanza ou con amargura.

Nesta fábula, la vida preséntase cumo un dialéctica entre’l mal y el bien, entre’l sofrimientu y la buenaventura, son las duas caras de la mesma moneda. Queremos ver los humanos qu’el mal pueda ser un castigu pol nuesu comportamientu, mas aquí nos amuestra qu’el sufrimientu vien pegáu al nuesu cuerpu, dende’l nacimientu, que ye parte de nós, fagamos lo que fagamos. Qu’el mal nun ye la consecuencia de los nuesos actos.

Nesti llibru, quier amostrar un sentíu al sofrimientu, el mal sirve cumo prueba pa la nuesa fidelidá ante’l ser supremu. Dious cumo Ser, parez nun ser todopoderosu, precisa de fidelidá de los homes, requier y esixe qu’Él seya’l únicu Dios que tien que ser adoráu. ¿Qué crase de Dious, precisa que lu adoren?

Y cumo cuida que la fidelidá de Job ye interesada porque él y la sua familia son felices y todu va bien, entuences cumo ye un ser resabiáu y perinquinosu, que se deixa mandonguiar pol Diabru, ataca al humanu pa comprobar si ye verdá que lo ama por cima de tolas cousas.

El humanu parez una moña qu’está a mercé de los antueyos de la vida, del Altísimu, que nun pinta nada y que lo chaculla cualisquiera y cumo quier. Y solo quéidale’l rezungar y maldicir a los vientos, que nunca contestan. Simplemente retrucan con reproches, pa sometelu ainda más.

Y cuando finalmente está definitivamente sometíu, está fábula amuestra una enseñanza de que la vida tien un únicu sentíu, adamase ante lo desconocíu, y non dudar nin perguntar, solo obedecer al poderosu.

Quiernos apregonar que la única finalidá del ser humanu ye ser un cordeiru, una candonga que nos lleve’l vientu, del que nun tenemos dereichu a espatalexar.

D’esti xeitu, conseguiremos ser recompensaos nesta vida hasta la fin de nuesos días. Cuánto desamparu y frustración, yá que nos cuenta nesti cuentu, cumo un home honráu padecía ensin saber porqué nin hasta cuando. ¿Hasta cuándo pué ún aguantar pa ser felicitáu?

Por esto, a los fieles solo quéidale la esperanza de la felicidá d’una vida eterna, depués d’esta, yá que sienten, comprueban que nesta, muerren seres mui queríos, apreciaos y virtuosos, sofriendo inxustamente. Nesto, outros profetas, nun mui convencíos y pescudando que los homes tampouco están engaluchaos d’apañar premiu na Tierra cumo Job; apregonan que hai esperanza, nuna vida acullá.