LAS CUESTIONES FILOSÓFICAS Y TEOLÓXICAS DE JOB (I)

 

Esti aberrunto qu’escribo, quiero dedicalu al mio profesor de Filosofía de 3º de BUP, del Claudio Moyano, que me fizo ver nesti cuentu, todu un manual de filosofía de la vida.

Tamién quiero ofrecer esto, a la importante xeira que ye’l pubricar la biblia n’asturianu, un xeitu más pa que la nuesa llingua pueda ser más valorada.

Cumo llector que fúi de la Biblia, que seguramente vuelva de cuando en vé a lliela, pos si enantes buscaba respuestas teolóxicas, agora pué interésame más cumo documentos filosóficos que buscan respuestas a la existencia de la vida, craramente con respuestas fantásticas, irracionales, celestiales (llonxe de lo mundanu), nas que buscan convencer a la humanidá de que la sua vida tien sentíu, que las suas amarguras tienen sentíu, que la inxusticia tien un porqué; asina sabiéndolu, pué allonxase d’esta, con esperanza y gayola.

Todas estas respuestas ofrécense cumo eternas, mas obsérvase que los llibros, cadaun col diferiente profeta, pero falando del mesmu Dious, y en nome del mesmu Dious, van mudando nas recetas y normas que se deben llevar na conducta humana.

Nesto, está el llibru de Job, nel que se cuenta cumo un home que se le considera rectu, temerosu de Dious, xustu y apartáu del mal, yera bien feliz, pos yera talmente recompensáu pol sou Dious na sua facienda y familia.

Y tan fiel yera, que cumo vía, que toda bienaventuranza yera gracias a Dious, pa evitar posibres pecáos ou falacias d’obra y pensamientu, pidía, supricaba a Dious pola sua bondá y ofrecía los sous respetos ante él.

Nesti llibru, el Diabru aparez también cumo Dios y fala con Yavé cumo un igual. Yavé encisca al Diabru, amostrándole qué fiel siervu tien en Job, mas el Diabru sabe bien retrucar, y fuchica a esti, con buen pesque, por onde más pué mancar, no material, nas riquezas, pa poner a prueba la confianza y la fé del subditu Job.

Craramente, hai dalgo craru, no que se llama Vieyu Testamentu, nesti se cuida qu’existen más d’un Dious. Ante esto, simpremente Yavé quier ser l’únicu adoráu pol sou puebru escoyíu. Nun pretende estruir a los demás, cada puebru tien los suyos. Y el Diabru, nun deixa de ser nesti testamentu, outro Dious que compite pol mesmu mercáu de fieles.