LA ÉTICA SOCIAL DE CONFUCIU

 

 La ética social de Confuciu.

La moral de Confuciu sobriza nel preceptu de que tolos homes son buenos por naturaleza y que la bondá se desendolca pol estudiu de los clásicos.

“El caminu rectu o norma de conducta moral debemos buscala nel nuesu interior. Nun ye verdadeira norma de conducta la que se guipa fuera del home, ye dicir, la que nun dimana directamente de la propia naturaleza humana.

La fin del home ye’l sou perfeccionamientu. Las honras precipales que s’apañan pa esi perfeccionamientu son: l’amor, la xusticia, la conocencia, la sinceridá y la piedá filial. L’egoismu ye la pior de las pasiones. L’home cumprídor escasea; si hubiera a esgaya, el mundu nun sufriría abondos males, cumo le fieren. Esti desprendimientu naz, pa Kung-tsé, del sentimientu de humanidá, nun de la caridá ruchada de lo cuitadicu.

Hai que pescudar con valentía. La base de la mayor parte de los males ye fomentar sentimientos envicaos. El cielu críu a tolos homes y dotóles de lleis morales que debían observar. Los homes precisa de sobrizu pa cumprilas. Esti sobrizu ofrezla el préncipe ideyal col sou modelu y el sabiu col enseñu de la sua doctrina. L’emperador debe ser el padre y la madre del puebru, y el Gobiernu tien que tomar cumo modelu la familia patriarcal. Los oficiales qu’ayudan a gobernar deben ascender después d’un rigurosu examen que supón una profunda conocencia de los textos clásicos. Un buen monarca procurará por cima de todu que haiga faz nel reinu, sin la paz nun pué enflorecer las honras.

Vemos, pos, qu´el sistema confucionista, por mediu d’aquella época sangrienta, tenía un oxetivu utilitariu fundamental: el bienestar de la humanidá. Tratábase, polo tanto, más que d’una relixón, d’un excelente sistema políticu.

Las cinco honras cardinales recomendadas por Confuciu son:

1-      La Benevolencia barca l’espíritu púbricu, respetu filial, piedá, etc.

2-      Rectitú arrequeda’l valor, fraternidá, integridá, pureza, etc.

3-      Corrección barca’l respetu, humildá, deferencia, etc.

4-      Conocencia resúmese en conocimientu del home, de la Naturaleza, de la fin, etc.

5-      Buena fé, comprométese en verdá, sinceridá, etc.

Estas honras afectan tolas relaciones entre soberanu a súbditu, entre padre y fíu, entre hermanu mayor y menor, entre esposu y esposa, entre amigos.