CENTRAL ELÉCTRICA. EN MEMORIA DE RIBALLAGU

Esta novela de Jesús López Pacheco, qu’esgraciadamente murriú prácticamente esqueicíu pola hestoria de la lliteratura castellana, tras pertenecer políticamente a un mundu que naide quier enrecordar cumo fui la griesca política antifacista na Dictadura Franquista, con un partíu cumo’l PCE qu’aburrunóu la democracia por una monarquía franquista, p’acabar entoñáu. También esto, favoreciúlu la marcha hacia Canadá, esqueiciendo los movimientos socioculturales que dirían sucediendo.

Podría ser una magnífica novela, con una temática, un esquema y unos conflictos a desendolcar que por esgracia nun describió craramente. El fallu nun está nos diálogos qu’amuestran los conflictos entre crases sociales y entre vecinos, criando un ambiente que caldía’l descontentu de los campusinos por muchu que los amos e inxenieros de la central y la sociedá que la construye busque congraciase paternalistamente, mas estos por necesidá tuvieron que trabayar pa ellos, unos mas prontu qu’outros, cuando les enzalamaron las suas tierras onde tenían las suas xeiras.

Por escasez y por esbrave, deixaron de ser campusinos pa ser obreiros, y d’una vida cuitada, de subsistencia ensin formación llaboral pa la vida “moderna”, d’una supuesta producción individual miserable y d’escasez a una esclavitú del patrón por un salariu y un mundu de consumu, que le facía trabayar ensin seguru y peligrando la sua vida. ¡Cuantos fiñecieron entre escombros y argamasa!

Enrecuerdo mui bien, onde se describe, cumo s’entoñaron cayendo al morteru, al esfayase ensin seguridá dalguna.

Uñíu a esta escena, l’escritor cuenta la griesca y asesinatu colectivu escontra un vecinu qu’abusaba de los sous vecinos, una xusticia nun descontentu popular, que se repitiú chiscando la casa del inxenieru na escuridá de la noche.

Con estas experencias, queidan aberruntos cortantes, cumo’l pesar d’una campusina, de porqué nun se vengarían d’estos folasteros que los eicharon de las suas tierras onde vivían, trabayaban y estaban tolos sous memorias familiares, sociales de vida histórica cumo comunidá, envede ensañase con un vecinu, que por diabru que fuera, yera ún d’ellos.

Cumo última voz, apregonando nel desiertu, restralla esa voz d’una vieyica, que chubiú al estráu d’unos infames premios, a la buena xeira d’unos trabayadores muertos, grita cúmo perdieron todu, y yá nun tiene nada, qué todu se lo apañaron.

Asina fui, cumo la corporación societaria eléctrica, personada nos sous inxenieros apaecieron nel rural cumo conquistadores, colonizadores que venía a salvar las animas subdesarrolladas y atrasadas de los campusinos, pa’l bien d’estos ingratos y de la humanidá.

Embaxu esta “comedia”, están los odios y el mundu de las apariencias consumistas de la aristocracia obrera. Qué diferiente frente al entornu campusinu.

Cuando s’acabóu la obra, sobraban todos, y entuences los campusinos nun pueden más qu’emigrar, pos la Central yá tié vida propia, nun precisa de casi naíde, ya nun hai tierras nin ganáu que asistir. Las suas nuevas casas que sustituyeron a las campusinas qu’emchapazaron, nun sirven pa las xeiras del campu, y nun las perciben suas.