DEIXANDO'L CUERPU. UN REBUYÓN DE PALABRAS.

 

Deixando’l cuerpU. Una antoloxía d’un gran artista, Fran Allegre, que lleva la música y las lletras nos bofes.

Ficéi una pequeña llectura d’este poemariu, que ye bien estensu, que cumo diz nel escomienzu, queida bien craru lo que ye un llibru con una poesía mui variada y diferiente, con, a veces unos poemas mui delicaos y trabayaos, cumo outros que son xixa pura, arrecadaos directamente de los bofes, ensin escatamundar, ensin llamber. Eso fá que muchas estrofas d’estas seyan rialmente compricadas d’entender, ¡que quieren dicir!, mas nun importa, porque la fuercia qu’amuestran ye tan desenratada y arrasadora, ensin acerandar, cumo chista l’outor.

Eso que ye lo que importa, lo qu’entrocha. Esa furia que quier esgañitase sobre la esistencia humana.

Mas nun debemos esqueicer, que también enseña, esas estrofas llírica, con muchu cariñu, que fá aberruntar, pescudar sobre’l amor, pero non solamente eróticu, sinon también social, uñíu a lo silvestre de la naturaleza, al llobu, a la llibertá que col sou magullu, tanto precisamos.

Ye increyible, cumo Fran que parez tan tranquilu, pue escribir con tanta ansiedá.

Craramente, ye un poemariu mui accidentáu, pero él nun engalucha, bien que lo cuenta, mas aprovecha, anque enfurruñe una migayina la poesía.

Paga la pena tener este llibru, anque solo seya por esas frases que tié, que chacullan la testa de la briega.