EL "CULTURALISMU" OU RELATIVISMU POSTMODERNU

El “culturalismu” ou relativismu postmodernu.

-De las custiones socioeconómicas y científicas.

Depués del marxismu, col Estáu de Bienestar, con “un capitalismu d’aspectu humanu”, “l’arroñamientu de lo soviéticu”, esperrríase polos médios académicos d’un “materialismu esblanquiñáu”, que se llamaría “posmodernismu”, anque también aparez con outros nomes cumo “culturalismu”, “relativismu postmodernista”. Nun séi hasta que puntu ye una teoría, ou más una actitú d’escreyimientu social.

L’orixen del relativismu postmodernu procede d’unas causas socioeconómicas y culturales, por una parte, abandonu de la filosofía nel siglu XX y, por outra, la rucha de nuevas ciencias, las sociales.

Por esto, plantían qu’el ser humanu debe ser estudiáu cumo productu sociocultural, cada sociedá tien la sua cultura y conforma a los sous componentes a la sua imaxen y semeyanza.

-El relativismu postmodernu sobre las creyencias.

Ye frecuente agora, la fé de que sobre cuestiones últimas nun se pué saber nada. La verdá sobre’l home y el mundu, sobre’l nuesu orixen y destinu, ye indescriptible. On más, el tentar atopar la verdá ye dañinu, porque defiende qu’hai sistemas trancaos al diálogo y al consensu social, a la diversidá en posilidades, culturas, etc.

La actitú post-moderna valora la tolerancia universal y propon renunciar a la esencia, al fundamentu.

Este xeitu considera tan fanático al materialismu cumo al criacionismu (ideyalismu), pos estas vides filosóficas cuidan que pueden interpretar, conocer y llegar a la rialidá, esencia del mundu y la naturaleza.

Seguramente, este relativismu postmodernu diferiénciase d’un relativismu vulgar en que s’esfuerza por saber de todu, mas nun afirma nin niega nada.

El modelu de persona culta, nel culturalismu, ye ser dalguien con mucha información, y cercanía a las suas fuentes, mas ensin deseyu de deprender valores.

El pensamiento del culturalismu ye conocer culturas eruditamente, cumo lletráu, pero nunca pingase con nenguna.

Al perder interés por la verdá oxetiva, este culturalismu posmodernu refier el valor de las cousas a las apreciaciones d’una comunidá. Cumo l’escepticismu de siempre, tenta despreciar la verdá.

N’apariencia, el culturalismu debería permitir un mayor entendimientu colas culturas ayenas y de las personas que pertenecen a ellas, mas en rialidá, fomenta’l desinterés y la incomunicación, yá que s’arreda n’educase en valores en común, y compartir pensamientos.