LA RACIONALIZACION DE LOS SERVICIOS

“La racionalización de los servicios asistenciales sanitarios” será necesaria, nun lo dudo, cumo en tolos servicios y recursos qu’hai, a mayores con una pobración rural escasa y esperriada, que parez que sería lo meyor que envede de acercase’l médicu a los pacientes y perder muchu tiempu y perras en viaxes, ser mui improdutivu; pos que meyor, que seyan los pacientes los que s’acerquen a los centros de salú, ou centros agrupaos cumo quieren criar agora, con más ferramientas y aparatos que nos consultorios, con más facilidá d’interné y outros servicios cumo’l farmacéuticu (que por ciertu, cuando se vayan acabando también colos consultorios llocales, estas farmacias llocales que nun estén cercanos ou na mesma llocalidá que del centru de salú, también esaparecerán, on más, de los que yá van esapaeciendo, agora mesmu)

Mas la midía “razonable” del “acercamientu” de los pacientes al centru de salú ye dalgu que tien trama y que non cuenta, porque craru, nun ye competencia suya, de la Conseyería de salú, y nun van atacar a los propios compañeiros de gobiernu y partíu, cúmo están las carreteras, cuál ye’l estáu de las carreteras –que muchas veces son nefastas, ensin mantenimiento, enllena de baches y curvas- pa poder dir con seguridá y comodidá; habrá ou nun habrá tresporte púbricu que lleve a los pacientes al centro, agora mesmu hai un tresporte a demanda p adir al centru de salú, que ye de pagu (nun de baldre), al qu’hai que llamar el dia enantes, en horario de mañana y muchas veces cuesta muchu que apañen el teléfonu. D’este xeitu, si precisas de médicu nel mesmu día, va ser imposibre, tendrás qu’aguardar a mañana, ou saber que vas ponete malu el dia enantes. Eso si, este autobús vendrá bien tempranicu a buscate y volverá a llevate a l’aldeya tres horas más tarde.

 Cuentan craru está, que si se van centralizándose los servicios, pa poder ser atendíu, habrá que solicitar cita, cumo na ciudá, pero no cuentan cumo se podrá facer cuando muchas veces, en muchas aldeyas, quédanse ensin telefonía móvil, ensin cobertura ou ensin telefonía fixa, ou ensin interné que se pudiera usar pa conectase cola web de sanidá y apuntase a la cita. Son bastantes cousicas que seguramente habrá dalguna más que nun percibo a mayores.