OCULTAR LAS VERGOÑAS
Escomenzamos los Reis con menos consultas médicas,
porque ou están de vacaciones ou días llibres que s’apañan, y ye que ye verdá
qu’hai poucos médicos disponibles, mas a ónde van ou fueron tolos que salieron
de las facultades, y a mayores, qué pasa colas prazas MIR, que ye dalgo obligatoriu
n’España, pero que siempre ufiertan menos prazas de las necesarias, polo que
también los graduáos nas facultades, muchos nun entran.
Debieron enanchar el númaru de prazas MIR, pero siguen
siendo insuficientes, y a mayores las facultades de medicina deben también
ofrecer menos prazas de lo que se demanda.
Son muchas cousas que nun se cuentan, nun que se tapan; nin que
s’ocultan. Simpremente nun se mencionan, anque se sabe que está latente. Nesto
s’asomeya muchu al cuentu de Poe, “El corazón acusica”, que depués del crimen,
queida la víctima emparedada, ensin sospecha dalguna. L’asesinu siempre lo
siente presente y cuida, anque nun lu quiera aparentar, que tolos demás, nun lo
perciben.
Asina ye, la metodoloxía de “lo técnicu”, cuando la
responsable precipal de la sanidá, repite continuamente qu’ella nun ye una
política sinon una profesional de la medicina, una xestora técnica y
alministradora, que busca la racionalización de l’asistencia sanitaria. Que nun
se mueve por “intereses políticos” sinon alministrativos.
Por eso, cuando le perguntaron qué por qué faltaban
médicos, que si nun salían ou nun había estudiantes de melicina, lo que
retrucóu fui que nun yera custión suya, de la sua competencia, que yera dalgu
que yá venía impuestu, venía heredáu y qu’había qu’amuelase, que yera dalgu
dolorosu, pero nun dependía d’ella.
A todo esto, agora se llama nun facer política sinón
alministración técnica, xestión, reforma, cumo si nada d’aquello tenga que ver
cola política, cumo si, los que la escoyeron, nun fueran políticos y quieran
refuyir de todu aquello que cheire a política, pa tapar las vergoñas.
Comentários