VILAR SECO, UNA PEQUEIÑA AYALGA

Estuve en Vilar Seco, del municipiu de Bumiosu, una aldeya que celebraba la “Feria das Colheitas”, entiéndase la “Feria de las Senaras”.

Esta feria yera la escusa pa regunise la xente de l’aldeya, vecinos, amigos, cercanos, y estar uñíos na praza, nuna carpa onde poder falar, cantar, escuchar música tradicional y popular, incluso porque non, todu con un pequenu mercáu de productos artesanales, del campu, llariegos, bien prácticos del día.

A esta llocalidá nun la conocía, ye toda una guipación, pos drento de lo qu’hai cercanu, ye onde más casas tradicionales pueden vese y más o menos amparadas; ensin branquiar, pos fuí una moda que sigue ellí, anguaño, cumo si fueran sureñas. Entovía, pior ye arroñalas pa volver a construyir unos mastodontes criminales de chalé, una pena, mui normalizada por todas estas tierras zamoranu-tresmontanas. Las portaladas de las casas tenían unas buenas llousas de pizarras.

Fui un día agradable entre carbayos y ancinas, viendo ganáu pol campu, pos cadavé ye más raru, anque tamién s’apreciaba que las cortinas estabán precipalmente de labrau. Pero l’aldeya yera bien bonita, con olivares, ellí gustaban mui mucho, pos teníanlos entumbiaos na calle precipal, adornándola, on siendo pequenos tovía.

Pola mañana había un paseicu de burros polos caminos, y después pola tarde había pequeña feria de productos de la tierra y artesanía.

Nel tema de la artesanía, lo más apreciáu yera l’escriñu, onde una vieyica, bien mayor vestía de ñegru, agachadica nun sentayu, cola faca diba apriguerando cada brime pa después trenzalu. Mira cumo tienen arguyu por esta sabiduría, que hasta tenían un allugamientu que llamaban “Oficina do Escrinho”.

Los burricos estaban bien guardadicos nuna tenada, yeran de raza tradicional, ellí hai una asociación pa’l sou curiau, la raza de burros d’ellí llámanlos mirandeses, y equí que son los mesmos, zamoranollioneses, son exemprales bien preciosos, de color escuru, ocre, cola panza branca y las oreyas bien dreichas, yeran unos “mozos” bien altos, con unas siellas de montar colocadas por cima de las alforxas.

Na feria vendíanse llambrones cumo “bolo de rei”, duces asomeyadas a las aceitadas, panes con pasas, panadería cumo boyas colos sous cachicos de chourizu y tocinicu. También vendían mullidas, siellas, alforxas y albardas pa caballerías; collares de material pa canelos, bien chulos; tamién ofrecían unos ricos licores artesanos de yierbas y de guindas, uñíu a esto había un mobiliariu bien bonitu con tronchos de freu, engurruvicháu y vieyu.

Todu esto estuvo acompañáu con un interesante espectáculu d’un grupu llocal de música “tradicional” pertuesa col protagonismu nel acordeón, y mirandesa con importancia na gaita.

Diba ver un alcuentru de pauliteiros, esos que baillan los lazos, las danzas de palos. Esta ye la danza más tradicional que se conoz, ye de tiempos esconocíos, consideran que yera una danza pa los homes guerreros de las milicias del conceyu, que cuando diban esapaeciendo, la Ilesia, los curas fueron adaptándolos pa la fiestas relixosas cumo’l corpus, el santu-patrón, etc., realmente son danzas bien espectaculares y más equí que facen unas acrobacias, que son un inventu abondo novedosu y mui particular.