PREVENCIÓN, ENANTES QUE NADA

El casu de la moza de Zamora n’Huelva, está demostrando que necesitamos de políticas sociales escontra la violencia a la muyer, tanto nel mundu educativu, cultural, económicu, nun solo no xudicial, qu’está amostrándose ineficaces, tardiegos y sobre todu, nada preventivos.

PREVENCIÓN ye lo que se precisa.

Porque el que maltrata, viola y mata, craramente nun querrá dir a la cárcel, pero si quier facer esta fechoría, va facela d’igual xeitu, pos asume este riesgu.

Por eso, la PREVENCIÓN solo se consigue con EDUCACIÓN, pa evitar que naide agreda.

Pero llevamos muchos años, ensin nada d’esto, pa los políticos ye más fácil y de baldre, encallar el códigu penal, y facer contentar al puebru con circu, con teatru mediáticu, yá nun se molestan a dar nin pan.

Rialmente acomatan los verdadeiros datos, que la mayoría d’agresores, pedófilos, violadores están drento de las familias, viviendas ou residencias (los curas son bien conocíos, y nun s’está esperriando tanta pubricidá nos medios), siendo las más “decentes”, “monogámicas” los que están aprovechando la sua parte de poder familiar pa violentar a las suas víctimas, indefensas, anque denuncien.

Tampouco dicen, cumo muchos d’estos agresores, anque vayan a la cárcel, rialmente son sociópatas que debían estar nun psiquiátricu, con tratamientu médicu, porque está craru, que eso cuesta más diñeru y xeira, que los meter en cimiterios humanos, onde a lu que se dedican ye chutase.

Nun buscan, estos políticos la sua rehabilitación nin reinserción social, simpremente, nun les interesa porque son los arreos más importantes p’apamplar y resquiciar al puebru. Pos el miedu ensin razonamientu nin reflexón, nin cultura, ye chicha de facismu, y este ye necesariu pal réxime. Pueden emplegalu pubricitariamente cuando les deseyan.

Los abolicionistas llevanlu clamando continuamente dende va años, cumo’l penau debe ser educau na empatía y na compasión col sufrimientu de la víctima y los sous familiares, sinon volverá a repetir la sua conducta sociópata, y la cárcel nun fa nenguna d’esas funciones, tanto pola sua estructura cumo tal, cumo por falta de interés políticu y ante todu, porque’l que haiga reincidentes, atestaya, y esta cola irreflexón y la incultura, son medios propiciatorios del facismu, y este ye precisu pa enveredar al puebru na opresión.