PA CUÁNDO EMBULIGAMOS AL CAPITAL

Ser optimista, ye mui difícil.

Quicias dalgunos teneis esi optimismu por naturaleza, criau a fuerza de dedicale tiempu y xixa a la política revolucionaria.

Resulta mui difícil ver signos definitorios de que las crases populares y trabayadoras estén concienciándose tan rápidamente nuna griesca política revolucionaria, anque seya antifascista y s’estéi formando nas caleyas.

A mayores, esto ye lo que siento y apercatu nun solo equí, sinon también nas ciudades grandes y na prensa, nun solo oficial, que sería de dudar, sinon también nas non oficiales.

Seguru qu’hai más rezungu social, agora que ha unos diez años, respectu al sistema, pero esti ánimo social queida en baldre y en continuas clamuras, drento de la casa, la familia, ou na cantina, nun busca la práctica, porque esta está amurniada, atristayada, desagrada e individualista, na que la actuación social y organizada nun sirve, sinon lo que se fa ye evitar que la crisis l’afectéi lo menos posibre, y que las políticas antisociales seya individualmente lo menos duras pa si mesmu.

Estenamente, dende que pasóu lo del 15M, hubu un salto cuantitativu en númaru de demandas y lluchas pa enfrentase los recortes antisociales, pero estos ciscos nun s’amuestran cumo rialmente nos centros de trabayu, por ende unu nun pica, puede perder l’emplegu temporal qu’unu tien, y queidase ensin nada. Y esto manifiesta cumo rialmente está habiendo respingos sociales nel mundo del trabayu, cuando se véi que puede perder l’emplegu de todas, todas, ye dicir, cuando esa empresa va afuyir y se va finiquitar, y ye fácil que pierdan todos, pero si nun ye asina, lo que se busca ye que cada unu, busca la salida individual menos dura, que le sobrice apriguerarse pal paru ou si ye meyor la prexubilación (anque yá esto, está mui llindau pa unos poucos, cadavé más escasos, después de tantas

“reconversiones”).

Nun hai conciencia suficiente, que cualitativamente ye esencia, que los trabayadores ocupen la empresa y se fagan amos efectivos d’ella, síganla faciendo productiva, que sería la única forma en que se puede contrarrestar la política de cierres patronales que tienen, pues está viendo que nun necesitan producir más equí, el mercau está saturau, y prefieren treslladalo, ou despedir a xente pa tener solo a los emplegado más dócile, que tienen menos antigüedá y más baratos, ou deciden subcontratar a outras filiales ou non que tienen gastos llaborales más baratos, etc.