L’ ARGUYU CAMPESINU.

L’outru dia, parllandu con un pastor recién xubilau, contome la sua murnia.
La tristura dalguien qu’ama el campu, qu’aturóu tolo que pudu pa xubilase, pero los años y la enfermedá nun daban más de si.
Narroume comu siendo pastor, un oficiu pol que tantu lluchóu, nun podía dalu en heriedu a sou fiyu, porque realmente yera una ruina, yera una total precariedá escrava, en total desamparu y a mercé de los caprichos d’unos poucos.
Via como estaban acabandu con una llarga tradición, pol que apostou dende fai muchos años.
Yera un home qu’aguantóu las grandes oleadas d’emigración, mientras via como los rapaces y rapazas afuyían del pueblu, y los que se diban, volvían todu farotos a descansar en branu. Mientras que el, sua muyer y fiyos nun podían parar, nin pa la zambra nin el candonguío.
Nel pueblu siguiú un uficiu que mamou dende pequeiñu, que deprendióu de los sous mayores, qu’ensiñou a los fiyos, pero esti mesmu con pena, nun podía empuntiar a naide a siguir.
El cariar colas oveyas, ye un anticualla que dióu de comer a muchas y tantas xeneraciones na necesidá.
Pa aprovisionar a la ciudá y a los consumidores non ganaderos de cordeiros criados nel campu, escoyía los carneiros y las oveyas que meyor creía. Nun necesitaba informática dalguna, conocía dende el sou nacimiento la crianza de los sous cordeiros, sabía mui bien quienes yeran los sous padres, como estaban asistidos, los sous males, todu, arrecadábalu bien na sua cabeza.
Y asina, tolos días del añu nel campu, dende l’alburiada hasta la noche, ensin farángolas nin vacaciones.
Esmerábase en curiar a la piara, en que estuvieran sanos, en medícalos lu menos posibre, pero nesti mundu de la burocracia capitalista, el campesinu nun paez que pueda tener llugar, pos Sanidá, lu acosaba, y tenía perder xeira en papeleos y requisitos innecesarios.
Pa que a la final, tener que soportar unas retribuciones impuestas como les diera la gana a unas corporaciones agroespeculativas, pa que nel mercau el consumidor ve unos precios imposibres, de copete.
Mientras que las suas oveyas andaban sanamente, via como las d’outros, tienlas atartalladas tol dia en tenadas, que sólo podían implase a piensu y sofrir muchos más andacios, pa lo que son medicadas preventiva e indiscriminadamente con más y más indiciones y antibióticos.
Y a él, páganle casi igual pol sou cordeiru sanu, como por cualisquiera de los outros.
Na sua llucha drentu d’esti capitalismu añusgante, quisou crecer pos yera lu que le aconseyaban repetidamente, qu’había que ser más eficiente, moderno, rentable, y bla, bla y bla… Pala final, ver como tolos sous esfuerzos d’una vida, están amornalaos, pos sou fiyu nun puede vivir viendu como les apazpañan continuamente el sou medio de vida.
Por eso, fuise a vivir d’outru llabor y n’outru llugar.
Cuando falan la prensa de campesinu, consideran esti nome como dalgu despachau ou muertu.
A pesar de que la xeneración de mios padres, esfungáronse del campu na sua gran mayoría, hubo xente que se queidóu, y qu’a pesar dellas diferiencias; pos nun fueron totalmente empremeable a l’ideoloxía agroindustrial, siguieron cudiando amorosamente a unos seres vivos, de los que nun solamente se crían pa vender, sinon pa que tengan una vida frescota, y den vida rufa na cocina. Engayolando nun sólo pola sua carne, sinon tamién pol entornu medioambiental beneficiosu que deixa. Dél que naide les paga, nin les agradecen, nin compensan.
Ye un símbolu d’un mundu en perigru escular, y que ye imprescindible.