UNA GRATA VISTA Y DESENGAÑU EN MUELAS, TIERRA DEL PAN.

Pasando por Muelas, aberruntóseme aparame y ver este pueblu que ya conocía, pero quise conocelo mas afondada y aquedadamente.
Dende la carretera, siempre vi el lletreru de la ermita de San Esteban, realmente nunca me llamóu l’atención, pero debido a una visita al Museo arqueolóxicu de Zamora, qu’esta na Plaza Santa Lucía.
Animo a todos a visitalo, val la pena. Desgraciadamente ye pouco conocidu, y naide estima los tesouros arqueolóxicos que nel se atopan. Entre estos, siempre falan un castru situau neste paraje, onde s’afalla la Ermita.
Un horizonte preciousu, con una placa qu’ellí está fincada, na cual explica la esistencia y la historia del Castru neste sitiu, mui llarga y rica en vida y población.
Pero a esto, nun le correspuendía nenguna vista conservada y clara de los restos de muralla y outras cousas que podían deixase ver y se amostraban na chapa desplicativa. Como asocede en muchos Castros excabados d’outros llugares como en Galicia ou Tierra de Miranda.
Polo menos equí, ye d’agradecer qu’enseñen dalgu que lo que hai nel entornu. Pues n’outros sitios como en Almaraz, en San Pelayo, onde tamién había un Castro, nun hai nada que nada.
Pero yendo más acullá, depués d’esto, quise entrar nel museu Arqueolóxicu y de Alfarería que dende la carretera, se ve arrogante.
Nel lletreru de la puerta, dicía que abría Xueves, Viernes y Sabadu, en horariu de mañana y tarde, pero, nun hubo xeitu de velo y amirar aquello que se prometía tan llindu, antigu y tradicional como yera la producción alfarera que fui de las mas antiguas de la provincia y con mucha enraigu.
Sea como sea, paséi varias veces por ende, pa comprobar que desatrancaban, y acabéi decepcionau. Nin por haber, había nengún papel que dixera porque razón nun estaba desapechau e incumplía los horarios, nin como lograr poder visitalo, puede que realmente nunca lo desapecharan, nun séi.
Una vez más, unas instalaciones y servicios que se prometían estupendas pal turismo, quédanse en nada.
Viendo nuna placa, tamién del Ayuntamientu, l’ufierta e información sobre una ruta de senderismu, la de los “Arribanzos del Esla”, asina la tenían escrebida, intentéi siguila, pero desgraciadamente, está penosamente señalada, y se esmorece un fácilmente, ensin saber por onde dir. Aún asina, se presentaba ante los mios ueyos un paisaxe fantásticu, llenu de megalitos rocambolescos, conformaos en estructuras equilibristas, qu’acompañadas polas paredes muriadas tradicionalmente polos campesinos, amuesaban unas semeyas embruxadoras y sumamente celestiales, qu’estando ende, paecía alcontrase n’outro mundu de silenciu y paz, dalgu maxicu y maníficu.
Pero, talo como vi, andenantes, el Ayuntamientu desplica nuna placa una construcción tradicional “La fuente del Arco” ou de “ Fuente de Valdemolinos”, la cual, está cayéndose ingrimo pola manguanería. Asina quieren arrear el turismu.
Outra enorme y desgraciada contrariedad, pues el Ayuntamientu, amuesa en fotos, una fuente llustrosa, mui allonxada de la realidá.
Finalmente una vez mas, esto ye un exemplu xeneral de que se diz más de lo que ciertamente se fai; ensin mantener nin apriguerar, nin conservar aqueillo que tien un valor y con el que dalgu de subvenciones consiguen. ¿Pero aonde van?
Pa terminar, quisiera perguntar ¿onde está el verracu que tenía expuesto pueblu na caleya?
Sólo queda, el sou recuerdo nuna placa informativa, de la sua existencia.