Un problema del llionesismu políticu.

Claramente, soi un simpatizante de los movimientos y asociaciones que lluchan pola identidá llionesa, y a consecuencia d’esto, el promover y reivindicar la Rexión Llionesa, cola sua autonomía social, política y cultural, pal “total” desendolque y cumplimientu de la llexislación actual.
Pa esto, hai múltiples colectivos y plataformas, que desgraciadamente nun están espardidos polas tres provincias.
Pero, aún asina, tienen dalgu en común entre todas ellas, ye el confundir autonomía llionesa, como única posibilidá de reivindicación d’un progreso y desendolque de la rexión llionesa, como si consiguiendo l’autonomía se amañaría todo.
Desgraciadamente, muchos d’ellos, lo único qu’entienden por progresar, ye lo más asomeyau a lo que la ideoloxía oficial del capitalismo diz que ye progresar.
Asina, ensin nenguna reflesión nin recapacitación, simplemente, reclamian pa nos, lo que tien los demás, las grandes ciudades.
Como exemplu d’esto, demándanse autovías, trenes de alta velocidá, campos de golf, etc., que nun favorecen el rispetu al mediu ambiente, nin tampoucu realmente crean emplegu nel mediu rural.
Esto tamién demuestra, como este llionesismu sigue los parámetros d’entender el desendolque de la nuesa rexión, como una simple custión de facer crecer a las ciudades, qu’equí se corresponden prácticamente colas capitales de provincia, onde mayoritariamente se alcuentran la mayor parte de la burguesía provincial, principalmente una pequeña ou mediana burguesía istalada nos intereses d’una economía, consumu y producción cercana y provincial.
Con reivindicaciones como las anteriores, lo únicu que consiguen ensin plantiase, ye que lo importante pa prosperar ye siguir defendiendo la estructura viaria radial promoviendo el centralismu de Madrí, faciendo dalguna excepción cola via de la plata, ou la que se pide dende Bergancia a Lleón.
Estas infraestructuras son un de los mayores daños que fai al desendolque de la nuesa rexión, la comunicación entre nos, y el apoyu a la política servilista y siguidista de la burguesía llocal y caciquil a las órdenes de la de la Capital del Reinu español.
Todas estas inversiones que se piden, xustifícanse pola necesidá que tien la nuesa rexión en dar facilidades al empresariau forato como al autóctonu, en que inviertan equí. Ye dicir, siguir fomentando l’economía capitalista pa que la burguesía siga acumulando mas beneficios, esperando claru está que d’esta maneira se espere que caiga como del cielo el emplegu y s’acabe la despoblación a consecuencia d’este maraviyosu desendolque a beneficiu del burgués.
Nun se les ocurren, non, demandar a l’Alministración, una verdadeira política de creación d’emplegu, creando asina empresas públicas asentadas en tol territoriu, tamién nel mediu rural, que sean diversificadas na sua producción, qu’aprovechen los recursos primarios, onde se transformen, y queden ellí el valor añadidu de la producción, buscando asina crecer en riqueza pal bien social.
De todas maneiras, una cousa debían plantiase, que sería nun promover identidá rexional basándose nel victimismu socioeconómicu, pues da una imaxen mui cuitada, amuesando argumentos puramente economicista y de avaricía a lo de los vecinos, sólo pensando pal bien llocalista.
Onque sea verdá que la mayoría de las inversiones va la metrópoli, aun asina, quicias lo que tenían que reflesionar sería, hasta que puntu esto ye debidu a culpa de la comunidad autónoma con metrópoli en Valladolí, o al mesmu sistema capitalista que nos gobierna.
Nun buscan realmente crear materiales, textos, actividades que promuevan una coincidencia territorial, cultural e histórica como pueblu.
Que pueda usase como usase pa crear una identidá, a parte de la situación socioeconómica del pueblu llionés. Qu’está claru que ye penosa.
¿Ou sólo ye interesante la custión identitaria y autonomista, porque económicamente la rexión llionesa ye una de las menos desendolcadas, empobrecidas y despobladas?
Esa ye la impresión que da, cuando se ve la propaganda de muchas d’estas organizaciones.

Sería mucho mas ricu, gratificante, coincidente y comunal, nun solamente pal pueblu llionés, sinon tamién pa los nuesos vecinos colos que nos une la cultura y tamién la historia, como ye Miranda y Asturias.