LA EMIGRACIÓN DRENTO DE LAS CLASES SOCIALES.

Siempre que me preguntan, comu ye posible qu’una provincia como la de Zamora, se alcuentre nuna situación tan degradante, de tanta despoblación, fai a un reflexionar que rialmente lo mas degradante qu’está ocurriendo na nuesa provincia, nuesa tierra y nuesa región, nun ye nin mas nin menos una superestructura, una ideología social que fundamenta la infraestructura económica na qu’estamos.
Una cousa que tanto repetimos los que vivimos en Zamora, ye que tenemos siempre una maleta amañada nel armariu.
Con esta cercana, siempre a manu, nos fai remembrar qu’en cualisquier momentu, tenemos qu’emigrar.
El emigrar ye una cousa que la mamamos dende bien pequeiños, enséñanoslo nuesos padres en toos sous comentarios, hestorias, tanto de vecinos como de las propias suyas.
Tenémoslo tan asumido que nun vemos salida nenguna. Nin fuerza nin ganas pa lluchar.
La cuestión sería en qué lluchar y pa qué lluchar.
Nesta llucha, que deberíamos facer, por ónde atacar.
A quién responsabilizar.
Si analizamos la problemática que causa l’emigración, ensin deixanos llevar polos tópicos de la tragedia inevitable.
Ensin remediu llegamos a la conclusión, que la falta causa última que provoca el paro, ye la falta de trabayu, d’emplegu que proporcione unos meios económicos necesarios pa vivir.
Por culpa d’esto, la metá de la población nacida na provincia de Zamora, vive fuera d’ella.
Embaxu esta perspectiva, nun debemos escaecer nunca, que si nun hay trabayu, los responsables que deben crealo y pa lo cual, cobran sous sueldos y son nomaos pol pueblu, que vota de vez en cuando; son los que tenían que responder de los sous actos y dar ante tou soluciones a los problemas qu’ocurren. Que pa eso, retienen nel sou bolsillo, gran parte de los nuesos impuestos.
Desgraciadamente, vemos, qu’a pesar de los sous gradilocuentes discursos en pos del interés general. La problemática de la emigración como consecuencia del desemplegu y la falta de oportunidades de tenelu sigui siendo un de los mayores problemas ensin resolver.
Por lo cual, tenemos que considerar y analizar qué intereses defienden la clase profesional política na su’actuación.
Una de las cuestiones que tanto analizaban los clásicos, yera estructurar en clases sociales las sociedades nas que vivían. Partir d’esto, intentar analizar su posible ideología, y afinidades a la sua llucha.
Por esto, el análisis de las clases sociales de la provincia, sus intereses como clase y la sua ideología, nos pué ayudar mucho y ver las razones polas cuales, un bien qu’en teoría sería crear emplegu p’asentar consumidores que gasten y activen la economía, nun se lleva a cabo.
Lo que facen ye marear la perdiz abriendo problemáticas, proyectos, planteamientos y pautas de actuación que despistan, atontan y en muchos casos atiborran la mente qu’ensin pararse a reflexionar, quierennos facer escaecenos d’este problema.
Vamos a determinar dalgunas clases sociales que vemos a primeira vista na nuesa tierra, y como ven y le afecta la cuestión de l’emigración:
El lumpen, pué considerásele más bien una subclase social obreira excluida y cuitada socialmente y llaboralmente, que crea el sou propio mundu pechau nun círculo de marginación y drogodependencia.
Cómu tal, cuesta alcontrar un mínimu atisbo de preocupación social ante’l fenómeno de la emigración, fuera del sou dia a dia d’endrogase.
La clase obreira, mayormente procedente d’una clase campesina emigrante que abandona el campu, lo agrícola pa trabayar principalmente nel sector terciario ou la construcción.
Debemos resaltar tamién, qu’esta clase obreira tien muchas diferencias endrento d’ella mesma, nun ye lo mesmu, las condiciones de los trabayadores ca vez mas mayores en edá, que son indefinidos o fijos, que tien una situación mas o menos estable y quieren deixar pasar el tiempu hasta la jubilación.
Equi tamién podíamos meter, a los trabayadores autónomos y profesionales que teniendo en propiedad, arriendo ou en hipoteca los meios de producción pa’l sou propio sostenimiento, se ven sigún en qué sectores de producción en ca vez mas peligru na sua propia existencia.
Nun ye lo mesmu, trabayar nun sector puyante y valorau social y económicamente como yera hasta agora la construcción, la fontanería, electricidad etc., que trabayar nel sector primario agrícola-ganadero, que d’en añu en añu, pierde ca vez más población y con una rentabilidá económica ca vez menor, impuesto por unos precios manipulaos al sou caprichu, ruinosos por embaxu de los costes de producción, a lo que se le une un horariu llaboral ensin horarios nin llibranzas.
Comu estudiau qu’esta, el ser trabayador autónomo-profesional ye muchas veces, el último recurso qu’alcuentra los trabayadores desemplegaos pa poder trabayar, puis asina pueden crear el sou propio centru de trabayu.
Nesti perfil, alcuéntrase los nomaos falsos autónomos, que son obligaos a dase d’alta nel régimen especial de autónomos pa conservar el sou trabayu na mesma empresa na qu’estaba enantes.
Endrentu tamién alcontramos, los rapaces que buscan el sou primer emplegu, ou contrataciones temporales, ou están na economía sumergida.
Tampouco debemos olvidar a las muyeres, qu’onque s’alcuentre muchas veces endrento d’estas posiciones sociales, pola sua propia situación de géneru, dedícanse gran parte d’esta población femenina al servicio doméstico de la sua casa, allonxada del mercau llaboral, y muchas veces nel umbral de la pobreza.
Pola sua condición de muyer, alcuéntranse estas trabayadoras en mayores dificultades de meyorar y asemeyarse económicamente al géneru masculino.
Ye una clase social acosada pol paru, que busca y muchas veces nun alcuentra trabayu nas empresas zamoranas y tien que dirse a trabayar fuera, a veces desplazándose temporalmente nel dia, na sumana o definitivamente.
Esta clase social, falta de organización y de organizaciones que debatan sobre los sous propios intereses de clase, que plantien soluciones a las causas del desemplegu. Ante esto, deixan este debate y las suas resoluciones a los nomaos “agentes sociales sindicales” que ensin saber rialmente como, cuando nin porqué, la administración general les dan una representatividá y un poder de decisión, que ye incontestada, y pola cual, se lliberan del mundu llaboral, y se transforman en emplegaos del Estau, con muchas subvenciones y prerrogativas pal sou propio funcionamientu.
Tamien, nesta clase social subrayar la existencia d’un personal “funcionario” de la Administración, acomodau que furrula muchas veces comu aristocracia obreira, cercana ideológicamente a la burguesía. Puis nun se siente atacada las sua posición social y económica, y los sous fiyos ya los tienen “preparaos y educaos” fuera d’esta provincia, pa que sigan siendo funcionarios irremediablemente ensin outro plantiamiento, tamién fuera d’esta provincia.
Onque, esta subclase social, véase segura socioeconomicamente, pueden empezar parte d’ella barruntar como’l sou tiempo está’cabándose ante las constantes privatizaciones que s’estan llevando a cabo, dende fai mucho tiempo.
Sólo aguardan, que nun les ocurra a ellos nin a los sous fiyos.
Pa lo cual, organízanse nos sindicatos, a los que ven necesarios pa recibir servicios e intermediación cola administración.
Claramente, la clase trabayadora ye la mayoritaria y ca vez mas grande en númaru poblacional, por eso mesmu mas dividida y diversa.
Drento d’esta clase social, alcuéntrase trabayadores en distintas condiciones sociales sigún los sous estudios.
Los que nun estudian, por las razones que sean, entran nuna dinámica de busca de emplegu en cualisquier sector, no que apareza. Asina, puen tener mas posibilidaes de trabayu na provincia y nel meio rural, pero con una temporalidá y unas condiciones llaborales de contratu basura.
Los qu’estudian, plantíanse principalmente el emigrar a la ciudá, especialmente si son de carreras técnicas, puis na ciudá, especialmente nas grandes ciudades pueden alcontrar, consultoras, empresas ou industrias que necesiten del sou serviciu y en meyores condiciones que nesta provincia, dalgu que nel meio rural zamoranu, nun hai. Neste subsector, siempre hai gente que quiere quedase, por lo cual, nun le importa, trabayar nuna categoría inferior a los sous estudios, para lo cual, suprime los sous estudios universitarios del currículo que presenta a ciertas empresas.
Drento d’esta xeira na busca infructuosa d’un emplegu estable, na empresa privada, siempre está nel horizonte y el deseo d’opositar a lo público, cuyo destino territorial principalmente acaba siendo la ciudá, onde se concentra la mayor parte d’este emplegu.
Pero, tamién se intuye la posibilidá ou el deseo d’el autoemplegu, la creación de la “sua propia empresa”
Equi entra l’animosidá, la capacidá económica p’emprender un’actividá económica nueva. La cual, muchas veces nun tien mas d’imaginación que darse d’alta nel mesmu sector económico nel que trabayaba, un bar, una tienda etc., inclusu posiblemente trabayando principalmente pal mesmu patrón qu’enantes que yera por cuenta ayena, transformándose en autónomo.
La gente procedente d’esta clase social, son mayoritariamente los que mas aman na nuesa tierra y desean trabayar n’ella, puis el arraigo social y familiar pesan muchu nos sentimientos.
Nun olvidemos tampouco, que na nuesa tierra, el meio rural ye rica en patrimoniu ecológico, y cultural tradicional creau pola clase campesina, con un estimau estilo de vida, que se asienta nel corazón de los fiyos de los trabayadores y campesinos, onque nun se valore hasta que nun s’esté fuera.
La burguesía.
Endrentu d’ella, forma parte un amplio espectro de condiciones económicas.
Fundamentalmente, hai una pequeiña burguesía de profesionales y autónomos, cuya actividá económica y las suas principales inversiones céntrase fundamentalmente nel meio nel que vive.
El formar parte de ella, nun solamente depende de la posesión o non de los meios de producción, sino tamién, el asumir los valores, la cultura política y un’ética que sustenta la vida del colectivo. La superestructura que caracteriza fundamentalmente a esta subclase social ye la d’adoptar y creerse patrón capitalista cercano al sou interés social y económico.
Esta subclase social está a caballo ente clase trabayadora y burguesía, y depende la sua posición social mas de los valores, cultura y ética política que tiene y que desprende, que de la acumulación de capital que acapara, que muchas veces ye inferior y con mas riesgos y preocupaciones económicas, que muchos funcionarios y emplegaos públicos.
D’estas condiciones socioeconómicas facen derivar los mui variaos comportamientos ante el mundu llaboral nel meio rural y la emigración a las ciudades, como sucede a cualisquier trabayador.
Los fiyos d’esta subclase pueden alcontrase nos mesmos dilemas y dificultades que cualisquier trabayador, sigún los sous condicionantes en que s’alcuentren.
La mediana y gran burguesía.
Se diferencian fundamentalmente en que la mediana a pesar de que la mayor parte de las suas inversiones de capital están nel meio onde viven; como ven restringidas la capacidá de poder aumentar los beneficios económicos nel meio, y nun creen en sou potencialidá. Plantíase invertir mas en negocios foratos, onde ven posibilidades de complementar y poder aumentar l’acumulación del capital.
Por esto mesmu, los sous fiyos envíalos a estudiar e inclusu a trabayar fuera, puis abarruntan mui llimitada la sua prosperidá, y que los sous beneficios nun dependen directamente del desenvolvimiento de la región, e inclusu, prefieren que nun haiga inversiones foráneas pa nun síntise más apequeiñecidos, puis como se diz nuna frase popular, prefieren ser cabeza de ratón, que cola de lleón.
Aun asína, viven y residen onde invierten, nesto diferéncianse mayormente de l’alta burguesía, qu’vive fuera del entorno nel que invierte, y nun vei nengún interés pol desarrollo económico de la zona, comarca y población, nel que nun se siente perteneciente.