LA CONOCENCIA DE LA TOUZA

La filosofía en cholas: La conocencia de la touza.

On asina, anque fomente un pensamientu ordenáu, la ciencia esplica diferientes esferas de la realidá, tien muchas ramas que se interrellacionan.

Todas estas ciencias facilitan conocimientos parciales acerca de la naturaleza, del mundu. Mas l’home precisa de conocimientos xenerales, pescuda d’esplicaciones completas, nesto está la filosofía.

Ye la única que plantía, ofrez interpretar cumo se desendolca la naturaleza y la sociedá. Ye esto ciertamente, lo que establez l’oxetu d’estudiu y deprendizaxe de la filosofía, ye dicir, el conxuntu de problemas qu’estudia.

Mientras que las ciencias en cada rama, desendolcan lleis parciales, que buscan conocer las causas y los efectos de los fenómenos de la naturaleza y la sociedá. La filosofía, pescuda las lleis más xenerales, ye dicir, las lleis que sirven de base al desendolque, non d’una parte, sinon de tolos fenómenos de la naturaleza, la sociedá y el pensamientu y las suas interrellaciones, contrariedades y uñiones.

Por ende, ye que la filosofía pué ser definida cumo la “ciencia”, el mediu qu’estudia las lleis más xenerales del desarrollu de los fenómenos. Por ello, la filosofía cucía nos bofes del mundu, arrecada las lleis parciales pa criar un sistema ordenáu de opiniones entorno al mundu d’alredor.

Pero también, la filosofía podemos conceptuala cumo una fin en si mesmu, pos la sua propia esistencia ye un valor d’observación, de sentíu de la vida, de reflexón constante, d’inquietú pa cucíar, pa deprender.