L'AMOR NEL CINE SOCIAL

La verdá ye que ye entallante’l cine de Ken Loach, nun solo polo artísticu, sinon también polo que cuenta, con escenas chocantes y significativas de la vida, la rutina de los obreiros y los sous barrios, con una dialética en muchos momentos qu’amuestran las retrucas y retolicas qu’asoceden na vida diaria.

Siempre busca figuras arquetípicas que puedan servir de modelu, y ser identificaos, anque envéde estar anguañu, atópanse na guerra civil española, na guerra d’independencia d’Irlanda ou na Nicaragua Sandinista.

Mas quiciás, lu que menos se le valora ye la importancia que le da al amor, d’un xeitu mui natural y social.

Sobre relaciones amorosas, tien una película que se llama “Solo un beisu”, nesta, trata de cumo un rapá d’orixe familiar pakistaní, mui tradicional musulmana, inamórase escontra la sua familia y el sou entornu cultural, d’una separada -que naide pescudaba- maestra de música de la sua hermana, nuna escuela de monxas católicas. Lu que arrecada muchos ataques.

Cuando se fá pubricu esta relación, la familia dél, quier que la abandone y casése en conveniencia. Por parte d’ella, atartállanla pa que lu deixe, pos ye musulmán, y amás está casada.

Drento d’este contestu, entre ellos hai muchos conflictos personales, cumo en toda pareya, que s’agudizan colas suas diferiencias de procedencia cultural, hestórica, etc.

Mas, a la final, l’amor trunfa, pero non cumo se plantía en Hollywood, sinon resumíu nuna frase, que se quieren mientras se quieran, y lluchan pol amor, un amor que se llaboran, pero que nun tien porque ser interminable, nin de cuentu de fadas. El amor por sí mesmu, pol sou deseyu d’estar uñíos.