LA HISTORIA SOCIAL NUNCA MÁS CONTADA.

Cuando falan y escreben sobre Alfonso IX del Llión, cumo propulsor del primer parlamentarismu n’Europa, onde nestas Cortes estaban representaos tolos estamentos sociales, amuestra que necesitaba recursos económicos pa seguir cola expansión conquistadora de la Corona. Mas debe facenos pescudar que seguramente las crases populares, especialmente de la ciudá tenían xixa, poder d’influencia, con una presión social de los crases urbanas, industriales –gremiales- y financieras, que ficieron qu’el rei tuviera que pedir conseyu y abrir unas Cortes.

Rialmente, ye mui difícil atopar lliteratura histórica de las sociedades de cada tiempo, y menos tovía, los conflictos sociales entre las diferientes crases sociales, cola sua estratificación y muchas veces, parez que la famosa reconquista, atafayóse d’un xeitu unidireccional d’unas monarquías “cristianas” escontra l’imperiu “musulman”, cuando efectivamente, nun hubo grandes batallas en xeneral, sinon pequeñas conquistas feudales, muchas griescas de sucesión entre familias pola corona, muchas batumberas entre monarquías, noblezas, obispos del norte, y nestas, las monarquías del sur, uñiase con unos ou con outros, según los intereses del momentu, lo que tácticamente se cuidaba cumo meyor, cumo tamién pedía sobrizu al exterior de la península en momentos d’amenazara d’existencia.

Todu esto ye complicau, pero cuentan la historia cumo si fuera un cuentu de mil y una noches, mas inda, ye peor enantes del feudalismu, na antigüedá, que casi nun se cuenta nada de los puebros prerromanos, y falan del imperiu romanu, cumo si fuera una marcha trunfal pola península, y la romanización cumo dalgo d’un día pa outro, ensin tantiar cumo yera’l sistema productivu, los propietarios de los medios de producción, las relaciones de producción, la especulación financiea de los metales, y la importancia de los intereses económicos de la minería de metales preciosos pa espurrir la conquista, y cumo la propia invasión sobrizaba a la economía del imperiu, gracias al arapiñamientu.