YOU SOI UN TRABAYADOR

Ken Loach, ye unu de los cineastas más importantes del sieglu XX, y agora d’escomienzos del XXI, anque yá se retira.

Col sou cine, retrata concienzudamente la sociedá británica, y neso está, una de los últimas “You, Daniel Blake”, nesta trata d’un home entrau en años, que trabayaba na construcción, entiendo que d’encofrador, pos la sua pasión yera la carpintería.

Dále un infartu, y atópase aviau, pos por un llau nun le quieren dar los servicios d’emplegu, el subsidiu d’enfermedá, anque le trascribe los médicos que nun pué trabayar, qu’el sou corazón está mui enfermu.

Tien dir a la uficina del paru, atópase con una muyer y los sous fiyos, que por llegar un poucu tarde a la entrevista, quítanle’l subsidiu social temporalmente, entre medias, nun tien sobrizu dalgún, colo que se mete nos servicios sociales, a recebir alimentos, pero tien que pagar l’allugamientu y los servicios básicos de lluz, pos viven ensin llectricidá, polo que acaba trabayando na prostitución.

El, Daniel, al entrar cumo demandante d’emplegu, pa conseguir una ayuda, hasta que consiga llegar a xuiciu pa conseguir un subsidiu de discapacidá, tien que facer el teatru de facer que fá, buscando un trabayu, enzolando que busca trabayu, amás, tien que facer tola burocracia por interné, dalgu que nun domina. Él que ye un analfabetu nas nuevas tecnoloxías, ye incapá y tienen que lu facer unos vecinos rapaces suyos.

Estos rapaces vecinos suyos, envéde trabayar, por onde cobran una migaya, prefieren dedicase al trapicheu de ropas falsificadas de China, que ganan más, trabayando menos, perdiendo l’arguyu de la xeira obreira.

Cumo nun quier facer teatru, cumo le piden dende los servicios d’emplegu, arreñiega y pierde’l subsidiu, queida na probeza y tien que vender tolas suas pertenencias de la casa.

A la final, llega el xuiciu, paez que todu va bien, mas está mui nerviosu, va’l serviciu, a la final, dále un infartu y muerre.

Tien un funeral de cuitadicos, con mui poucos amigos que l’enrecuerde, pero todos mui amurniaos, tanto pola sua muerte, cumo pol sou heriedu, que por escribíu queida, y que diba a llier nel xuiciu, aproclamando qu’el enantes que nada yera una persona.