sábado, 25 de junho de 2016

EN ZAMORA NUNCA PROSPERARÁ’L VOTU DE LAS ESQUIERDAS NESTI RÉXIME.



A parte de que la estructura socioeconómica de la sociedá nun favorez que las esquierdas puedan apañar la deputación, hai un factor decisivu a mayores d’esti.

Y esti ye, un clientelismu que nos come a esgaya, que nun nos deixa nin espurrinos, nin chamuciar, nin espatalejar.

Mientras esto siga, nun habrá democracia nin llibertá verdadera.

Pos siempre tendremos miedu a ser melaos y azañaos, pol mal nuesu ou de los nuesos, especialmente nuna economía con tan poucas oportunidaes pa vivir.

LA REVOLUCIÓN NUN SE FÁ NAS URNIAS



Anque lo meyor de todu, ye que nadie fala de revolución.
Naide pubricita esa necesidá que tenemos los trabayadores d’escachar la nuesas cadeas, la nuesa condelga que nos añusga los capitalistas, con tolas suas moñas cumo’l Rei, políticos del réxime, exércitu, medios burgueses de comunicación… en xeneral fuerzas represivas y d’enzolamientu.
Pero el nun citar REVOLUCIÓN, amuestran craramente que nun ye necesaria a la nuesa sociedá, que ye cuestión del pasau, cumo si la “SOCIALDEMOCRACIA” pola que tantu s’enratan, nun estía más que muerta y antigua.
Pero fagan lo que fagan, la “socialdemocracia” ye la ideoloxía la que sofre más que naide la crisis económica y política, pos está talmente picada, cumo’l vinu esbaratau, pos están amostrando continuamente qu’están faciendo lo mesmu que los outros de “dereichas”
La “socialdemocracia” está aneya.

domingo, 12 de junho de 2016

FÁBULA D'ESOPO: L’Aigla de ala cortada y la raposa.



Ciertu dia un home apañóu un aigla, cortóu las suas alas y soltóla nel corral con tolas gallinas.
Amurniada, l’aigla, quien fuera poderosa, agachaba la cabeza y ayunaba: amostrábase cumo una reina encarcelada.
Pasou outro home que la viú, gustóle y compróula. Arrincóu las plumas cortadas y crecióulas de nuevu. Por todu esto, l’aigla llevantóu’l vuelu, garróu a una lliebre pa dásela al sou amu lliberador.
Viula una raposa y con emburrios contábale:
-Nun le lleves la lliebre al que te sobrizóu, sinon al que t’apañou, pos nun necesita nada pa ser buenu. Pescuda más bien, amollece al que te cazóu, nun vaya repuñate de nuevu y espipe talmente las alas.


Siempre responde cumpridamente a los benefactores, y por prudenza, desadérrate de los sonces, qu’enzolan el viciu.

L'AMNISTIA SOCIAL



La campaña sobre l’AMNISTÍA SOCIAL, queida esqueicíu y fuera a parte a tolos PRESOS POLÍTICOS comunistas, anarquistas y antifacistas que se comen muchos y muchos años de cárcel, y ensín enrecordarse d’ellos nin un solo amentamientu.
Y agora, que la represión está afectando también a personas y militantes que proceden de los movimientos sociales nacíos d’esta “crisis”, quieren separalos y diferiencialos del restu.
Ye una xeira nada d’agradecer, esto de l’amnistía social están faciéndole’l trabayu al Estau y al Gobiernu, dividiendo a los reprimíos políticos escontra los poderes.
Lo buenu d’esti llabor, ye qu’están faciendo enrecordar a más amplia pobración la palabra “AMNISTÍA”, que s’amostraba esqueicía, nin reconocía por mucha xente, aterrau pola farsa del réxime y la transición.
Solo quiero remembrar que los presos y represaliaos son todos, cada un llucha según las suas xixas, posibilidaes y son atacaos según le parez ou puede a las fuerzas del Estau.

La griesca de los presos políticos ye efectu de las inxusticias sociales del Capital y los sous monopolios.
NUN LO ESQUEICEMOS, nun los empuntieis nin por activa nin por pasiva.

UN AÑU NEL GOBIERNU DEL AYUNTAMIENTU de Zamora, Y SIGUE ENSIN CUMPRIR LA INSTALACIÓN DEL MONOLITU ENRECORDANDO A LOS REPRESALIAOS DEL FRANQUISMU.



Da pena y vergoña cumo un gobiernu d’un Partíu que se diz y s’autodenomina republicanu, y sacuden la bandeira republicana cada pouco, cumo simple teatru. Nun acaba de poner na plaza del gobiernu’l monolitu aprobau pol ayuntamientu nel que gobernaba el Partiu Popular, va tiempu.
Yá, por poner nun ponen mandangas nin se arrodian nos suas retolicas.
Qué pasa cola Comisión criada pa esto, nun dan restola, ¿nun tienen sangre?, ellí amás de Izquierda Unida, están Anticapitalistas, CGT. ¿que pasa con ellos?
Y tolas xixas que ficimos pa sacar las perras pa construyir esta escultura, ¿están perdas?